26 yanvar etirazlarının xronologiyası [Video-Foto]

Bloqqer Emin Milli ilə gənc fəal Turqut Qəmbər Nəsimi rayon 22-ci polis bölməsindən çıxarılaraq aparılıb.

Bölmə qarşısında dayanan yaxınlarına onların hara aparıldığı barədə məlumat verməyiblər.

Hər iki şəxsi Nəsimi rayon məhkəməsinə aparıldığı ehtimal edilir.

Nəsimi rayon Polis İdarəsinin 22-ci bölməsində 30 nəfərə yaxın aksiyaçının saxlandığı bildirilir.

Bu barədə AzadlıqRadiosuna saxlananların bölmə qarşısında dayanan yaxınları məlumat verib.

Səbail rayon Polis İdarəsində araşdırmaçı-jurnalist Xədicə İsmayılova da daxil olmaqla 20-yə yaxın adam saxlanır.

Polis bölməsindən sərbəst buraxılan bir qadın AzadlıqRadiosuna saxlananlardan AXCP üzvü Kəmalə Bənanyarlının qolundan xəsarət aldığını deyib. Xədicə İsmayılovanın müdafiəsinə cəlb olunan vəkil Elçin Sadıqov polis idarəsinə buraxılmayıb.

İndiyə qədər əldə etdiyimiz məlumatlara görə, aksiya ilə bağlı 30 nəfər Xətai, 19 nəfər Nəsimi, 20 nəfərə yaxın da Səbail polisində saxlanır.

Nəsimi rayon Polis İdarəsinin 21-ci bölməsinə təcili tibbi yardım maşını gəldiyi bildirilir. Bu barədə gənc fəal Kənan Qasımlı öz profilində məlumat paylaşıb. Onun yazdığına görə, tibbi yardım gənc fəal Tural Həsənzadəyə görə çağırılıb. Onun səhhətində problemlər yarandığı bildirilir.

Bölmədən AzadlıqRadiosuna saxlananların olduğunu təsdiqləsələr də, əlavə məlumat verməkdən imtina ediblər.