«Bütün arqumentlər bitib»
Vəkil Xalid Bağırov Xədicə İsmayılın son sözünün yarımçıq kəsilməsinə münasibət bildirib. O deyib ki, təqsirləndirilən şəxs son söz söylərkən bütün vasitələr keçərlidir: «O bütün vasitələrdən istifadə edib hakim qarşısında özünə bəraət qazandıra bilər. Görünən budur ki, məhkəmə son söz institutunu belə inkar edir, işin mahiyyətindən danışmağı belə yaxına qoymur».
Vəkil deyib ki, o, jurnalistin son söz çıxışını görüb və bu mətni bir saata sığışdırmaq olardı. «Ancaq bir saata belə dözmək imkanında deyillər», - söyləyir Xalid Bağırov.
Vəkil Xalid Bağırov prosesi kənardan izləyən hüquqşünas kimi məhkəmənin ümumi gedişinə də öz qiymətini verib: «Son iki məhkəmədən - Yunusların və Xədicə İsmayılın məhkəməsindən sonra görünən bir nəticə var. Hakimiyyət bu tip məhkəmələrdə yeni tendensiya tətbiq edir. Görünən odur ki, bütün arqumentlər bitib. İstintaqın nə dərəcədə biabırçı olduğunun görünməsini belə istəmirlər».
Məhkəmədə sözü bir neçə dəfə kəsilən Xədicə İsmayılın çıxışının mətni. Xədicə çıxışın sonunda təşəkkür hissəsinə keçməyə macal tapmadan məhkəmə prosesi dayandırıldı.
Hökm Sentyabrın 1-də açıqlanacaq.
Sentyabrın 1-də nahar fasiləsindən sonra Bakı Ağır Cinayətlər Məhkəməsində AzadlıqRadiosu-nun əməkdaşı, araşdırmaçı-jurnalist Xədicə İsmayıla hökm oxunması gözlənir.
Dünən Xədicə İsmayıl məhkəmədə son sözünü deyib, amma hakim onun nitqini bitirməsinə imkan verməyib və onun «mahiyyəti üzrə danışmadığını» bildirib.
Bakı Ağır Cinayətlər Məhkəməsinin yaxınlığındakı çayxana bu gün bağlanıb. AzadlıqRadiosu-nun əməkdaşları bunun səbəbi ilə maraqlananda çayxanadan onlara «yağış yağacağını» bildiriblər.
Amma araşdırmaçı-jurnalist Xədicə İsmayılın məhkəməsində iştirak etmək üçün ora yığışanlar AzadlıqRadiosu-na bildiriblər ki, dünən burda izdiham olduğundan görünür çayxana rəhbərliyinə obyektini birgünlük bağlamaq tapşırığı verilib.
