Siyasi Məhbusları Müdafiə Mərkəzi (SMMM) siyasi məhbus sayılan şəxslərlə bağlı siyahını yeniləyib. Bu barədə Mərkəzin təmsilçisi Oktay Gülalıyev məlumat yayıb.
O.Gülalıyev vurğulayıb ki, 2012-ci ildə Masallıda həbs olunan Surac Ağayev azadlığa çıxdığından, onun adı siyasi məhbus siyahısından çıxarılıb.
Ancaq «Müsəlman Birliyi» Hərəkatının fəalı Əhsən Nuruzadə, «Azadlıq» qəzetinin bölgə müxbiri Ziya Əsədli və jurnalist Məhbub Zülfüqarlının adları siyahıya daxil edilib.
Əhsən Nuruzadə narkotikdə, Ziya Əsədli xuliqanlıqda, Məhbub Zülfüqarlı isə rəsmən böhtan atmaqda günahlandırılsa da, Mərkəz onların həbsini siyasi motivlərlə bağlayır.
«Bundan əlavə, 2016-cı il yanvarın 12-si və 13-də Siyəzən rayonunda ərzaq məhsullarının bahalaşması ilə bağlı keçirilən etiraz aksiyasından sonra həbs edilən 11 nəfərin adı da siyasi məhbus siyahısına əlavə olunub. Hazırda siyahıda 159 nəfərin adı var. Bunun da 19 nəfəri jurnalist və bloqqerdir», - O.Gülalıyev bildirib.
XATIRLATMA
Bu, Azərbaycanda siyasi məhbus sayılan şəxslərlə bağlı hüquq-müdafiə təşkilatlarının vahid siyahısı deyil. Hüquq müdafiəçiləri arasında bundan başqa daha bir siyahı var. Orada yer alan məhbusların sayı bir qədər azdır.
Azərbaycan rəsmiləri isə ölkədə siyasi məhbusların olması fikrini qəbul etmirlər. Onlar deyirlər ki, siyasi məhbus sayılan bütün şəxslər konkret törətdikləri əmələ görə məsuliyyətə alınıblar.