ABŞ-da sağ qanad qruplar arasında populyar olan “Parler” sosial media vebsaytı Rusiyada mənzillənən texnologiya şirkətinin köməyi ilə işini bərpa edib. Bu haqda yanvarın 18-də media yazıb.
Sosial şəbəkənin işi yanvarın 11-də kəsilmişdi, Amazon Web Services (AWS) zorakılıqla bağlı kontentlə düzgün davranmaması iddialarından dolayı onun işini dayandırmışdı.
Buna da bax: Milli qvardiyaçıların siyasi sədaqəti yoxlanır
Zorakılıq çağırışları
Bu addımadək platformada zorakılığa dəstək mesajları gen-bol yayılıb, Apple və Google da “Parler” tətbiqini mağazalarından çıxarıb. Bütün bunlar yanvarın 6-da Birləşmiş Ştatlarda Prezident Donald Tramp tərəfdarlarının Kapitoliyə hücumundan sonra baş verib, sosial şəbəkədə yeni etirazlara çağırışlar səslənib.
Vebsayt yanvarın 18-də işə düşüb, ancaq rəhbəri mesaj yazıb ki, şəbəkənin funksionallığını bərpa etmək üzərində işləyir. Mesaj yazmaq xidməti aktiv olmayıb.
Vebsaytın işlətdiyi internet protokol ünvanı iki rusiyalının idarə etdiyi “DDos-Guard”a məxsusdur. Bunu “Reuters” və Netflix-də şəbəkə və sistemlər üzrə vitse-prezident Deyv Temkin yazıb.
Parler is back up, and being hosted by "DDOS GUARD" out of Russia. If that%27s not an obvious sign of its malfeasance, there%27s nothing else that could possibly be shown to convince you. pic.twitter.com/FkScxQdCoK
— Dave Temkin (@dtemkin) January 18, 2021
ABŞ-ın hüquq mühafizə və kəşfiyyat rəsmiləri Rusiyanın ölkənin seçki prosesinə propaqanda və haker hücumları ilə müdaxilə etdiyini deyirlər. Rusiya siyasi bölücülüyü qızışdırmağa, ictimai fikri manipulyasiya etməyə, ovaxtkı namizəd, hazırda prezidentlikdən getməkdə olan Donald Trampı dəstəkləməyə çalışıb. Rusiya isə iddiaları rədd edib.
DDoS-Guard kimə məxsusdur
Parler-in rəhbəri Con Matze və “DDoS-Guard” təmsilçiləri məsələni şərh etməyiblər.
Buna da bax: FTB silahlı etirazla bağlı onlayn ‘söhbət’ləri izləyir
Yanvarın 18-də Parler.com Matzenin “Fox News”a müsahibəsinin linkini yayıb. O deyir ki, şəbəkənin yanvarın sonunda işini bərpa edəcəyinə inanır.
“Reuters” yazır ki, “DDoS-Guard” irqçi, sağ-qanaq və konspirologiya saytları ilə işləyib, həmçinin Rusiyanın hökumət saytlarını dəstəkləyib.
“DDoS-Guard”ın vebsaytında ünvanı “Cognitive Cloud LP” şirkətinin adıyla Şotlandiya göstərilir. Ancaq “Reuters” onun sahibinin Rusiyanın Rostov-na-Donu şəhərində yaşayan iki nəfər olduğunu yazır.
AWS xidməti dayandırandan sonra Parler Amazonu ötən həftə məhkəməyə verib. Amazon isə qərarını müdafiə edərək bildirib ki, Parler zorakı kontenti silməyib.
“Apple” şirkətinin icraçı direktoru Tim Kuk deyib ki, Parler postları idarə etmək qaydalarını dəyişərsə “App Store”a qayıda bilər.