Birləşmiş Ştatlar Rusiyanın ilhaq etdiyi Krımda jurnalistin Ukrayna üçün casusluq ittihamıyla saxlanmasını “Rusiyanın Ukraynada təcavüzü haqda həqiqəti deyənlərə qarşı daha bir repressiya cəhdi” adlandırıb.
“Rusiya yarımadada ukraynalı fəalların təqibini, müstəqil səslərin hədəfə alınmasını davam etdirir”, – Dövlət Departamentinin sözçüsü Ned Prays martın 17-də tvitində yazıb.
Russia’s arrest of a journalist in Crimea on “espionage” charges is another attempt to repress those who speak the truth about Russia%27s aggression in Ukraine. Russia continues to prosecute Ukrainian activists and target independent voices on the peninsula. #CrimeaisUkraine
— Ned Price (@StateDeptSpox) March 17, 2021
“Propaqanda”
Bir gün öncə ikili Rusiya və Ukrayna vətəndaşlığı olan Vladislav Yesipenko Ukrayna kəşfiyyatı üçün informasiya yığmaqda şübhəli bilinərək saxlanıb. O, həm də AzadAvropa/AzadlıqRadiosu-nun Crimea.Realities portalı ilə əməkdaşlıq edir.
Ukraynanın Xarici Kəşfiyyat Xidməti bu addımı Moskvanın regionu qanunsuz ilhaqının 7-ci ildönümündə “propaqanda” kimi təsvir edib.
Buna da bax: Bayden Putinə ‘qatil’ dedi, Rusiya səfirini geri çağırdı
Rusiya Federal Təhlükəsizlik Xidmətinə (FSB) görə, saxlanma zamanı Yesipenkonun maşınında “partlayıcı cihaza oxşar” əşya tapılıb. FSB iddia edir ki, o, Ukrayna Təhlükəsizlik Xidməti üçün informasiya yığdığını boynuna alıb.
Yesipenko Krımın Aluşta şəhərinin sakini Yelizaveta Pavlenko ilə birlikdə martın 10-da saxlanıblar. Onlar ukraynalı şair və mütəfəkkir Taras Şevçenkonun 207-ci ildönümü tədbirində iştirak edirlər.
Pavlenko sonradan azad olunub.
Buna da bax: ABŞ Rusiya üzərinə sanksiyalarını genişləndirib
Təzyiq və qorxutma məqamı
AzadAvropa/AzadlıqRadiosu-nun Prezidenti Ceymi Flay Yesipenkonun saxlanmasının “dərin narahatlıq” doğurduğunu deyib, bunun “Kremlin Rusiyanın ilhaq etdiyi Krımda hər hansı mümkün alternativ səsə qarşı təzyiq və qorxutmaya əl atdığı” vaxtda baş verdiyini vurğulayıb.
Rusiya Ukraynanın Krım yarımadasını 2014-cü ilin martında ilhaq edib, regiona hərbçilər göndərib, referendum keçirib. Azı 100 ölkə səsverməni qanunsuz sayıb. Bütün bunlar isə Ukraynanın moskvapərəst prezidenti Viktor Yanukoviçin kütləvi etirazlar nəticəsində devrilməsindən sonra baş verib.
İnsan haqları qrupları Rusiyanın o vaxtdan ukraynalı fəalları, ilhaqı sorğulayan hər kəsi təqib etdiyini bildirirlər.
Moskva həmçinin Ukraynanın şərqində separatçıları dəstəkləyir. 2014-cü ilin aprelindən orada münaqişədə 13 mindən çox adam öldürülüb.